मेरो बितोस् जीवन !!

Kanakdhara, Swami, Swadeshanand,कनकधरा स्वामी स्वदेशानन्द, pallawa, पल्लव

कनकधरा स्वामी स्वदेशानन्द

गोर्खाकी जननी हिमालतिरकी पूर्वीय गङ्गा तिमी।
टिस्टाखाङ् हिमशैलदेखि बहँदै बङ्गाल पुग्ने तिमी।।
तिम्रो यो जलमा शहीदजनको गर्नेछु है तर्पण।
टिस्टा-रङ्गितको किनारतिर नै मेरो बितोस् जीवन।।

तिम्रो यो जलको विशाल दहमा चुर्लुम्म डुब्कन्छु म।
तिम्रो यो जल हो सुधा जगतमा मान्ने सधैं गर्छु म।।
तिम्रो यो तटमा म पितृजनको गर्नेछु है तर्पण।
टिस्टा-रङ्गितको किनारतिर नै मेरो बितोस् जीवन।।

 

तिम्रो यो जल काँध बोकिरहँदै जान्छू महाकालमा।
तिम्रो यो जलको पवित्र महिमा भन्छू महाकालमा।।
तिम्रो यो जलले म बोलबमको गर्नेछू पूजार्चन।
टिस्टा-रङ्गितको किनारतिर नै मेरो बितोस् जीवन।।

तिम्रो यो जलमा अजस्र जलका धाराहरू देख्छु म।
तिम्रो यो जलमा समस्त जलको देखिन्छ सम्मेलन।।
तिम्रो यो जलमा गतात्म-जनको गर्नेछु है तर्पण।
टिस्टा-रङ्गितको किनारतिर नै मेरो बितोस् जीवन।।

मेरो निम्ति तिमी पवित्र जल हौ गङ्गासरी छौ तिमी।
गोर्खा-मोक्ष-प्रदायिनी बन तिमी आकाश-गङ्गा तिमी।।
मेरो अस्तु महाप्रयाण-दिनमा ल्याई खसाल्नू यहाँ।
टिस्टा-रङ्गितको किनारतिर नै मेरो बितोस् जीवन।।

गोर्खाको इतिहास देखिरहने साक्षीप्रिया हौ तिमी।
गोर्खाको ममता बढाइरहने गोर्खाप्रिया हौ तिमी।।
तिम्रो मन्दिर एक निर्मित गरी गर्नेछु पूजार्चन।
टिस्टा-रङ्गितको किनारतिर नै मेरो बितोस् जीवन।।

गोर्खाको इतिहास बोकिरहने गोर्खादसी हौ तिमी।
गोर्खा-दुःख-निवारिणी बन तिमी गोर्खीय-गङ्गा तिमी।।
मारिन्छन् जति वीर ती समरमा गर्छू यहाँ तर्पण।
टिस्टा-रङ्गितको किनारतिर नै मेरो बितोस् जीवन।।

गोर्खा-भागिरथी! हिमालतनया! टिस्टा! जगद्व्यापिनी!
गोर्खा-जीवन-दायिनी-प्रणयिनी नारायणी हौ तिमी।।
गोर्खेराज्य-प्रदायिनी बन तिमी गर्छू सधैं पूजन।
टिस्टा-रङ्गितको किनारतिर नै मेरो बितोस् जीवन।।

टिस्टाखाङ्-दुहिता हिमालतिरकी आधारभूता तिमी।
तिम्रो आँचलमा समस्त जनको पाइन्छ सञ्जीवनी।।
गोर्खाल्याण्ड् अनि इन्द्रकीलबिचमा तिम्रो छ सद्भावना।
टिस्टा-रङ्गितको किनारतिर नै मेरो बितोस् जीवन।।

छन्द: शार्दूलविक्रीडित
– गोर्खा एकात्मता खण्डकाव्यबाट उद्धृत (२००६ मा लोकार्पित।)

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.