दृष्टान्त – भाग: दश

Spread the love
Jaya, Gobjnda, Nuwakot, जयदेव गोविन्द, pallawa, पल्लव

जयदेव गोविन्द

पाए बेकारको दर्जा उल्टै नाश गराउँछ
हीराको खाटमा राखी माछो के चैन पाउँछ ?

सुरक्षा नै दशाजस्तै बन्छ ढर्रा बढी गरे
खुसीले कसरी बाँचोस् जाबीको चिडिया हरे ?

नाशिन्छन् कुलका शोभा दुष्ट सन्तान जन्मिए
खुम्चन्छन् रूखका हाँगा काँडाका झाङ जेलिए

 

ज्यादा उद्दण्डता बोके झुक्छ पक्कै स्वयम् शिर
अग्लेका बाँसका टुप्पा घोप्टिन्छन् धरतीतिर !!

अर्तीले घूसका प्यासी बन्दैनन् राष्ट्रसेवक
गुनासाले लुगा काट्ने धन्दा छाड्दैन मूषक !!

पूजा, ऐश्वर्यका भोगी बन्दैनन् बढिया जन
गान्धी या बुद्धका हेर नम्र सामान्य जीवन !!

सानाले भुल्दछन् बाटो ठूलाले नगरे चियो
घुम्लान् के दाइँमा गोरु विना दाम्ला विना मियो ?

घमण्डी व्यक्तिको विद्या घमण्डैमा हराउँछ
काँडाले ढाकिए पुष्प टिप्ने मान्छे डराउँछ !!

मिल्दैनन् पूर्णता केही चिल्ला आदर्श धाकले
जस्तै होस् बलियो मोटो गाडा तान्दैन बाघले !

जिन्दगी उठ्नका लागि चाहिन्छन् योग्यता, छवि
टुक्का, जोक फुँदा जोडी हुन्न कोही महाकवि !!

छन्द: अनुष्टुप्

 

Leave a Reply

Your email address will not be published. Required fields are marked *