तिलाचन बस्याल
कच्चा प्रयत्न गर्दा हरबार हार हुन्छ
संघर्ष खेर जान्छन् दोषी निधार हुन्छ ।
थोरै अभाव रहँदा खासै फरक नपर्ला
छोडेर गइदिएमा झल्को हजार हुन्छ ।
चालेर हेर्नु पहिला केही कदम अगाडि
भुँइमा पछार्न आफ्नो मान्छे तयार हुन्छ ।
देखेर सुक्ष्म कमिलो हेप्ने बदल्नु बानी
संसार सङ्ग जुध्ने उसको बिचार हुन्छ ।
ढुङ्गा मुढाहरूले के बुझ्थे छाल पीडा
धक्का सहेर बस्ने खोला किनार हुन्छ ।।
मुजारे मुसम्मन अखरब
221-2122-221-2122
©तिलाचन बस्याल
गल्याङ -५ स्याङ्जा
कार्तिक १६,२०७४
