हिमालचन्द्र ‘अविश्रान्त’
“खबरदार !मृत्युका व्यापारीहरू”
गतिका विरोधीहरु
इतिहासको मृत्युको घोषणा गरिरहेछन्
इतिहासको यो कस्तो भद्दा मजाक हो ?
धोकाको खुनी तरबारधारीहरु
विश्वासको मृत्युको घोषणा गर्न उत्ताउलिएकाछन्
जीवनको कति घीनलाग्दो उपहास हो ?
विषाक्त घृणाको व्यापारीहरु
प्रेमको मृत्युको घोषणा गर्न उत्साहित छन्
अस्तित्वको सत्तामाथि यो कति कुरुप ठट्टा हो ?
यथास्थितिको जुठेल्नुमा रमाएका झिङ्गाहरू
सपनाको मृत्युको घोषणा गर्न लालयित छन्
चेतनाविरुद्ध यो कस्तो राक्षसी अट्टहास हो ?
उद्धेश्यको चिर दुश्मनहरु
विचारको मृत्युको घोषणा गर्न तम्सिदैछन्
मस्तिष्कविरुद्ध यो कति कायरतापूर्ण आक्रमण हो ?
अन्धकारको भूतबँगलामा निद्रामस्त लाटोकोसेराहरू
उज्यालोको मृत्युको घोषणा गर्न आतुर छन्
आशाको घाम छेक्ने यो कस्तो दुस्साहस हो ?
साबधान !आतँकको मसानघाटमा बसेर
जीवनको सर्वोच्चताको घाँटी निचोर्न खोज्ने जल्लादहरू
जबसम्म हुँदैन समयको मृत्यु
तबसम्म अस्तित्वको ब्रम्हाण्डकोशमा
मृत्युको कुनै अस्तित्व हुनेछैन
मृत्युको अर्थ जीवनको नवरूपान्तरण हुनेछ ।
