नीता के.सी. भट्टराई
हद के हुन्छ मायामा, त्याग की प्राप्ति
हद के हुन्छ त्यागमा,निराशा की तृप्ति
माया,त्याग,संतुष्ठी फगत,भावना हो मुटुको
हद के हुन्छ तृष्णामा,विरक्ति की आशक्ति – !!!
उनि बदलिनुको अर्थ जान्न पाए हुन्थ्यो
अभिनय हैन,यथार्थ मान्न पाए हुन्थ्यो
सपना बुन्दै, उध्रादै गर्नु सक्दिन अब
जीवनका सामिप्यको तारा भन्न पाए हुन्थ्यो – !!!
भगवान जान्दिन तर पुजा जान्दछु म
मोक्ष जान्दिन तर त्याग जान्दछु म
नसोध मायाको अर्थ र परिभाष बेर्थै
माया जान्दिन तिम्रो रिक्तता जान्दछु म – !!!
कसिंगर झैँ होइन जीवन बढारेर फाल्न मिल्ने
आँशु मात्र होइन जीवन बहाएर फाल्न मिल्ने
बेदका ऋचा हो कि, पानीका फोका हो जीवन
सुनाखरी झैँ होइन जीवन उखलेर फाल्न मिल्ने – !!!
प्रश्नै प्रश्नको यो जीवन, अझै प्रश्न बन्न मन लाग्यो
बेहिसाब बेहिसाब माया, अझै बेहिसाब गर्न मन लग्यो
मन त थियो समाहित समाहित भई बहुँ संग संगै
आँशु नै आँशुको बनि, अझै परेली चुम्न मन लग्यो – !!!
मेरा आँखाहरू रसाएका छन्,तिमीले पाईला अन्तै मोड्यौ
मेरा भाबनाहरू डराएका छन्,तिमीले यात्रा बिचैमा छोड्यौ
भुल्नु अन्त हो यात्राको,भुल्न नसक्नु निरन्तरता मायाको
मेरा रहरहरु च्यातिएका छन्,तिमीले किंन्चित आफुलाई बेच्यौ – !!!
